Ysgolion Uwchradd

Trwy gydweithio, mae e-sgol yn cefnogi ysgolion uwchradd ledled Cymru i:

• Ehangu eu cynnig cwricwlwm ôl-16.
• Sicrhau bod dysgwyr yn cael y cyfle i astudio pynciau na fyddent ar gael iddynt yn eu hysgol eu hunain fel arall.
• Hwyluso cydweithio rhwng ysgolion.
• Lleihau costau ac ôl-troed carbon ysgolion.

Bwriad cychwynnol e-sgol oedd galluogi ysgolion uwchradd gwledig i allu cynnig ystod eang o bynciau i'w dysgwyr ôl-16. Yn raddol, mae ysgolion uwchradd mewn ardaloedd gwledig a threfol ledled Cymru wedi mabwysiadu ethos e-sgol o gydweithio er budd eu dysgwyr.

Yn gyffredinol, mae ysgolion uwchradd yn cydweithio ar draws clwstwr o ysgolion o fewn pellter teithio i'w gilydd. Mae cyrsiau cydweithredol e-sgol yn dilyn model dysgu hybrid, gyda dysgwyr yn cael mynediad at gyfleoedd dysgu cydamserol o bell ac anghydamserol o bell a ategir gan sesiynau wyneb yn wyneb.

Mewn amgylchedd addysgol, mae'r ffordd y mae dysgwyr yn derbyn ac yn cael mynediad at wersi a chyrsiau yn newid yn barhaus. Mae cydweithio ag e-sgol yn sicrhau bod:

• Ysgolion ac awdurdodau lleol yn cadw eu dysgwyr ôl-16 oherwydd bod y cyrsiau y maent am eu hastudio yng Nghyfnod Allweddol 5 ar gael iddynt
• Staff yn parhau i addysgu'r cyrsiau y maent yn angerddol amdanynt yng Nghyfnod Allweddol 5, trwy gydweithio o fewn eu clystyrau penodol a thu hwnt
• Dysgwyr yn cael cyfle i ddatblygu sgiliau ychwanegol, gan gynnwys sgiliau dysgu annibynnol
• Ysgolion yn gallu cynnig cyrsiau cyfrwng Cymraeg i’w dysgwyr, gan gefnogi nod Llywodraeth Cymru o gael 1 miliwn o siaradwyr Cymraeg erbyn 2050

Chwiliwch drwy’r map rhyngweithiol isod i weld sut mae e-sgol yn galluogi nifer o ysgolion uwchradd ar draws Cymru i gynnig pynciau hybrid.