Mae cyrsiau cydweithredol e-sgol yn cael eu hamserlennu’n ofalus ac mae dysgwyr yn cael mynediad i'r gwersi o'u hysgolion eu hunain. Defnyddir dull dysgu hybrid sy'n cynnwys tair agwedd:
Bydd y mwyafrif o wersi cydweithredol e-sgol yn cael eu haddysgu ar-lein, naill ai trwy MS Teams neu Google Classroom. Wrth gael mynediad i’r gwersi cydamserol o bell, bydd dysgwyr yn defnyddio ystafell ddosbarth dynodedig e-sgol yn eu hysgolion a fydd yn cynnwys sgrin fawr (i wylio’r addysgu), gwe-gamera, a seinydd/meicroffon addas. Bydd dysgwyr yn cael mynediad at lwyfan dysgu rhithwir er mwyn cael mynediad at yr adnoddau gwersi a chwblhau gweithgareddau a thasgau.
I ategu'r dysgu cydamserol o bell a wyneb yn wyneb, bydd gweithgareddau a thasgau anghydamserol o bell yn cael eu defnyddio. Mae'r gweithgareddau hyn yn cael eu cwblhau gan ddysgwyr yn annibynnol ac fel arfer tu allan i amser gwersi strwythuredig. Mae'r gweithgareddau anghydamserol o bell yn galluogi dysgwyr i atgyfnerthu'r gwaith a gwblhawyd yn ystod eu gwersi, ond o fewn amserlen benodol.
Er mwyn mabwysiadu dull dysgu hybrid yn llawn, bydd dysgwyr yn ymweld â'r ysgol sy'n cynnal y cwrs yn gorfforol ar adegau. Trefnir hyn rhwng yr ysgolion. Mae’n rhoi cyfleoedd i’r athrawon a’r dysgwyr feithrin ymddiriedaeth a pherthynas â’i gilydd ac i gwblhau ambell weithgaredd benodol na fyddai modd eu cyflawni'n rhithiol o bosib. Mae amlder y sesiynau wyneb yn wyneb hyn yn amrywio o un awdurdod lleol i’r llall. Fodd bynnag, trefnir sesiynau wyneb yn wyneb o leiaf unwaith bob hanner tymor.
Yn barod i ymuno â rhwydwaith e-sgol neu â chwestiynau? Byddem wrth ein bodd yn clywed gennych!
